Leitað að eftirmanni Scholes

Glazer fjölskyldan er tilbúin að gefa Sir Alex Ferguson fjármagn til að finna miðjumann sem á að fylla skarð Paul Scholes þegar hann hættir. Frá þessu greini The Manchester Evening News.

Scholes er 35 ára og hefur verið einn allra besti leikmaður United um langt skeið. Portúgalinn Miguel Veloso og Króatinn Milan Badelj eru taldir efstir á óskalista Ferguson.

Veloso spilar með Sporting en Badelj er ekki eins þekktur. Hann er 21. árs leikmaður Dinamo Zagreb sem hefur verið líkt við Zvonimir Boban í heimalandi.

Ferguson mun annars fylgjast grannt með spennandi leikmönnum sem taka þátt í heimsmeistaramótinu í sumar. Sá gamli er reyndar vanur því að ganga frá sínum kaupum fyrir öll stórmót til að forðast uppsprengda verðmiða á leikmönnum.