Hugsanlegt vanhæfi ráðuneytis verður skoðað

Ragna Árnadóttir dómsmálaráðherra segist ekki telja að hún eða starfsfólk dómsmálaráðuneytisins séu vanhæf til að úrskurða um það hvort veita eigi fólki gjafsókn í málum gegn ráðuneytinu. Þetta segir hún vegna orða hæstaréttarlögmannsins Ragnars Aðalsteinssonar, sem í gær gagnrýndi meðferð ráðuneytisins á gjafsóknarumsókn íransks hælisleitanda. Hún hyggst hins vegar ætla að kanna málið betur.

Hælisleitandinn hafði óskað eftir gjafsókn til að reyna að fá synjunarúrskurði Útlendingastofnunar, og síðar dómsmálaráðherra, um hælisvist hans hnekkt. Hann fékk gjafsókn í héraði, tapaði þar málinu, og vildi síðan einnig fá gjafsókn fyrir Hæstarétti. Þeirri umsókn var hafnað.

Ragnar gagnrýndi þetta í fréttum RÚV í gær og sagði að þar sem dómsmál hælisleitandans var höfðað gegn ráðuneytinu hefði átt að vísa umsókn hans um gjafsókn annað.

Þessu er ráðherra ósammála og bendir á að allar umsóknir um gjafsókn fari fyrir sérstaka gjafsóknarnefnd. Synji hún umsókn megi ekki veita gjafsóknina „Gjafsóknarnefnd er sjálfstæð og lýtur ekki boðvaldi ráðherra og ekki hefur hingað til verið talið að ráðuneytið eða ráðherra sé vanhæfur þegar kemur að málum sem beint er gegn því,“ segir hún. Þau mál hafi verið allnokkur í gegnum tíðina. „Og mér er ekki kunnugt um að vafi hafi fyrr risið um hæfi ráðherra eða starfsmanna ráðuneytis.“

Sjálf eigi hún ekki persónulegra hagsmuna að gæta í málinu og sé því ekki vanhæf. „Allt að einu gefur þetta mál mér tilefni til að kanna það til hlítar hvort ráðuneytið eigi að beina því til annars stjórnvalds að taka afstöðu þegar um ræðir mál sem beinist að ákvörðun sem tekin hefur verið í ráðuneytinu,“ segir hún. - sh