Mun Burnley sparka Laws?

Brian Laws er á barmi þess að verða rekinn frá Burnley samkvæmt enskum dagblöðum. Laws hefur aðeins stýrt liðinu í tíu leikjum; unnið einn, gert eitt jafntefli og tapað átta.

Liðið er sem stendur í fallsæti, þremur stigum frá öruggu sæti og hefur leikið leik meira en keppinautarnir.

Laws er fyrrum stjóri Sheffield Wednesday en hann skrifaði undir samning til tveggja og hálfs árs eftir að Owen Coyle yfirgaf Burnley og tók við Bolton. Margir sparkspekingar töluðu um ráðningu Laws sem eina þá metnaðarlausustu í sögu ensku úrvalsdeildarinnar.

Nú er stjórn Burnley víst farin að átta sig á því að hún gerði mistök. Burnley á leik gegn Wigan á laugardag og ekkert nema sigur getur bjargað starfi Laws er talið.