Ráðherra segir vandann gríðarlegan

Fjárhagsvandi Álftaness er gríðarlegur og ástæða hans er sambland af hruninu og offjárfestingu. Þetta sagði Kristján L. Möller, ráðherra sveitarstjórnarmála, í utandagskrárumræðum um fjárhagsvanda Álftaness á Alþingi í gær.

Magnús Orri Schram, Samfylkingunni, fór yfir áhrif vandans; þau birtast í allri þjónustu sveitarfélagsins við íbúana. Kvaðst hann óttast fólksflótta og að Álftanes geti orðið annars flokks sveitarfélag. Kenndi hann átján ára kolrangri efnahagsstefnu um ástandið.

Ásbjörn Óttarsson, Sjálfstæðisflokki, vísaði því á bug að efnahagsstefnu stjórnvalda væri um að kenna; sökin lægi hjá efnahagsstefnu sveitarstjórnar Álftaness. Gagnrýndi hann um leið ákvarðanir núverandi ríkisstjórnar um hækkun tryggingagjalds og atvinnuleysistryggingar sem þýddu tilflutning upp á tvo og hálfan milljarð króna frá sveitarfélögunum í ríkissjóð.

Velti Ásbjörn líka fyrir sér hvort rétt væri að lögbinda að sveitarfélög þurfi að bera umfangsmiklar fjárfestingar undir eftirlitsnefnd um fjármál sveitarfélaga og/eða að íbúar þurfi að kjósa um slíkar framkvæmdir.

Ragnheiður Ríkharðsdóttir, Sjálfstæðisflokki, sagði sveitarfélagið Álftanes hafa offjárfest, ábyrgðin væri því þess.- bþs