Búnaðarþing hefst í dag

Búnaðarþing hefst í dag í Bændahöllinni og stendur fram á miðvikudag. Aðildarumsókn Íslands að Evrópusambandinu, jarðalög, fjármál bænda og uppbygging félagsskerfis þeirra verða helstu mál þingsins auk hefðbundinna þingstarfa, að því er segir í tilkynningu frá Bændasamtökunum.

Yfirskrift setningarathafnarinnar í dag er: „Aftur kemur vor í dal".

„Allmargir nýir þingfulltrúar mæta nú til leiks og það er gaman að segja frá því að í fyrsta sinn sitja þingið systur, þær Fanney Ólöf Lárusdóttir bóndi á Kirkjubæjarklaustri og Guðrún Lárusdóttir bóndi í Keldudal," segir í tilkynningunni.