Lampard tilnefndur til útvarpsverðlauna

Frank Lampard hefur unnið til ýmissa verðlauna á ferlinum en aldrei hefur hann fengið verðlaun fyrir frammistöðu í útvarpi. Það gæti þó breyst fljótlega.

Lampard hefur nefnilega verið tilnefndur til óskarsverðlauna útvarpsins í Bretlandi. Lampard fær tilnefningu í flokknum besta viðtalið.

Lampard var reyndar ekki tekinn í viðtal heldur hringdi hann í útvarpið og hellti sér yfir útvarpsmanninn sem var að tjá sig um sambandsslit hans og Elen Rivas.

Lampard ofbauð talsmátinn og ákvað að svara fyrir sig í beinni. Það gæti skilað honum verðlaunum en þau verða veitt þann 10. maí næstkomandi.