Lampard hellti sér yfir útvarpsmann - hljóðbútur

Frank Lampard misbauð umræða um sig í útvarpinu svo svakalega að hann hringdi inn í þáttinn og hellti sér yfir útvarpsmanninn í fimmtán mínútna rifrildi.

Útvarpsmaðurinn kallaði Lampard viðbjóð í kjölfar ásakana um að hann væri slæmur faðir en Lampard er nýskilinn við barnsmóður sína. Útvarpsmaðurinn sagðu að menn sem létu börn sín búa við erfiðar aðstæður væru veikir og hreinn viðbjóður.

Lampard ku búa í risahúsi en fyrrverandi unnustan og börnin búa í lítilli íbúð.

Systir Lampard heyrði spjallið, lét Lampard vita og hann hringdi síðan í kjölfarið í þáttinn.

Mikill hiti var í rifrildi þeirra sem stóð yfir í fimmtán mínútur eins og áður segir. Lampard kallaði útvarpsmanninn meðal annars hálfvita og ítrekaði að allt sem hann gerði væri fyrir börnin sín.

Lampard sagði að íbúðin væri til bráðabirgða og að hann myndi kaupa handa þeim hús sem væri jafn gott og hans, jafnvel betra.

Fyrrum unnusta Lampard lét frekar ljót orð falla um leikmanninn í blaðaviðtali og Lampard ásakaði hana um að hafa fengið sér aðeins í tána áður en hún lét orðin falla.

Heyra má hluta af viðtalinu hér.