Benítez: Eigum okkur tvö markmið

„Við stefnum á sigur í öllum leikjum sem eftir eru," segir Rafael Benítez, knattspyrnustjóri Liverpool. Liðið burstaði Benfica 4-1 í gær og komst í undanúrslit Evrópudeildarinnar.

„Við eigum tvö markmið það sem eftir lifir tímabils og stefnum að því að ná þeim báðum. Við ætlum að gera atlögu að fjórða sætinu í ensku úrvalsdeildinni og vinna Evrópudeildina."

Eftir leikinn í gær hrósaði Benítez Fernando Torres og Lucas Leiva sérstaklega. „Lucas lagði sig allan fram og vann vel. Ég er mjög ánægður með hve mikla vinnu hann leggur í leikina og í dag voru hann og Javier Mascherano að leika lykilhlutverk," sagði Benítez eftir leik.

Jorge Jesus, þjálfari Benfica, segir betra liðið hafa unnið. „Liverpool er frábært lið og það sást í þessum leik. Við áttum í miklum vandræðum með skyndisóknir liðsins," sagði Jesus.

Liverpool mætir spænska liðinu Atletico Madrid í undanúrslitum keppninnar. Sigurvegarinn úr þeirri rimmu mætir svo sigurvegaranum úr bardaga Fulham og Hamburg í úrslitaleik.