Tómas Leifsson: Langt síðan að ég hef séð FH-liðið svona lélegt

Framarinn Tómas Leifsson fannst sitt lið uppskera alltof lítið í 3-0 tapi sínu á móti FH í Laugardalnum í dag. Framliðið fékk færin til að skora en skynsamir FH-ingar refsuðu þeim fyrir að nýta ekki færin.

„Mér fannst við vera betri allan fyrri hálfleikinn og fram eftir seinni. Það er langt síðan að ég hef séð FH-liðið svona lélegt og ég veit ekki hversu margar feilsendingar þeir áttu. Þeir héldu boltanum ekkert og það var lélegt hjá okkur að nýta það ekki," sagði Tómas Leifsson eftir leikinn.

„Við fáum tækifæri til þess að skora, ég fær tvö færi, Hjalli fær gott færi líka og fleiri en við þurftum bara að nýta betur tækifærin. Ef við hefðum potað boltanum inn þá hefði það getað breytt miklu. Það er lélegt að tapa þessu 3-0 því mér finnst það ekki gefa rétta mynd af leiknum," sagði Tómas.

„Frammistaðan var góð, mér fannst við halda boltanum vel og áttum góðar sendingar á milli manna. Það er ekki oft sem FH er látið elta boltann. Við spiluðum vel en Gulli varði vel og hann er sá besti í markinu," sagði Tómas að lokum.