Matvælastofnun kærir níu kúabú fyrir brot á lögum um dýravernd

Matvælastofnun Íslands hefur kært níu kúabú til lögreglunnar fyrir brot á reglugerð um nautgripahald og lögum um dýravernd. Kærurnar koma til vegna þess að búin hafa vanrækt að tryggja kúnum átta vikna útivist á ári. Þetta er í fyrsta sinn sem kærur af þessu tagi eru lagðar fram hér á landi.

Ekki fæst uppgefið um hvaða kúabú er að ræða en þau eru öll enn með fulla starfsemi og selja afurðir sínar til íslenskra neytenda. Kærurnar voru lagðar fram í gær.

Brot á reglugerð um nautgripahald varða sektum eða fangelsisvist, en hvorki upphæð sektar né lengd fangelsisvistar er tilgreind nánar í lögunum.

Þessi brot á dýraverndarlögum geta varðað sektargreiðslum eða fangelsisvist allt að einu ári. Samkvæmt upplýsingum fréttastofu eru þessi mál þannig vaxin að líklegt þykir að búin verði dæmd til greiðslu sektar.

Matvælastofnun fór af stað með átaksverkefni um útivist mjólkurkúa vorið 2009 eftir að hafa fengið ábendingar um að átján bú hleyptu kúnum ekki út eins og lög gera ráð fyrir. Í kjölfarið voru send bréf til forsvarsmanna búanna þar sem þess var krafist að þeir virtu lög og tryggðu kúnum minnst átta vikna útiveru yfir árið. Átakinu var haldið áfram síðasta vor og sömu kröfu beint til kúabúa.

Kýr eru almennt hafðar á beit er á tímabilinu frá júní til septembermánaðar.

Nú þegar tæpar sex vikur eru eftir af árinu er ljóst að þau kúabú sem ekkert hafa hleypt kúnum út yfir árið hafa gerst brotleg við lög og leggur Matvælastofnun því fram kæru sína.

Þess má geta að fyrir árið 2002 var ekki tekið til þess í íslenskum lögum að nautgripum þurfi að tryggja lágmarks útivist en eftir að upp kom mál þar sem bóndi nokkur hélt gripum sínum inni allt árið var þetta ákvæði lögfest.