Flóðbylgjur skullu á strandbyggðunum

Svo virðist sem dregið hafi verulega úr gripdeildum í Concepcion í Chile, næststærstu borg landsins, en hún varð einna verst úti í jarðskjálftanum á laugardag.

Stjórn landsins lagði mikla áherslu á að stöðva þjófnaði úr verslunum og sendi fjórtán þúsund manna herlið þeirra erinda á vettvang, meðan björgunarfólk vann hörðum höndum að því að bjarga fólki úr rústum húsa.

Þjófnaðaraldan sem braust út strax um helgina gerði það að verkum að erfiðara var að útvega mat og aðrar nauðsynjar handa nauðstöddum, þar sem verslanir höfðu víða verið tæmdar og jafnvel kveikt í þeim.

Í gær voru 723 dauðsföll staðfest, en óttast er að sú tala muni hækka eitthvað. Flest dauðsföllin urðu í litlum byggðarlögum við ströndina fyrir miðju landsins, næst upptökum skjálftans. Flóðbylgja skall á þessum byggðum stuttu eftir að jarðskjálftinn reið yfir eldsnemma á laugardagsmorgni.

Meðal annars fórust þar um 40 eftirlaunaþegar, sem voru á sumar­ferðalagi í langferðabifreið skammt frá sjávarþorpinu Pellehue. Þar hafði hópurinn numið staðar á áningarstað yfir nóttina. Þegar skjálftinn reið yfir hélt hópurinn á brott hið fyrsta til að komast frá ströndinni, en það dugði ekki til því þrjár flóðbylgjur skullu af miklum krafti á ströndinni og náðu allt að 200 metra inn á land.

Í gær höfðu einungis fundist lík fimm manna úr þessum hópi eldri borgara.

Íbúar í Chile þekkja vel hættuna af flóðbylgjum í kjölfar jarðskjálfta. Vegaskilti vísa leiðina upp til hærri svæða þar sem fólk er óhult fyrir flóðunum.

Í bænum Pelluhue hljóp fólk hópum saman af stað og hrópaði á nágranna sína að koma sér út úr húsunum.

„Um það bil 20 mínútum eftir skjálftann komu þrjár flóðbylgjur, tvær þeirra gríðarmiklar, um sex metra háar, og sú þriðja jafnvel enn stærri. Sú fór yfir allt,“ sagði Claudio Escalona, rúmlega fertugur maður sem náði að komast upp á hæð fyrir ofan bæinn.

„Við heyrðum óp í börnum, konum og öllum,“ sagði hann. „Síðan féll ógnvekjandi þögn yfir.“

Bærinn er nú rústir einar. Heimilistæki, föt og dauðir fiskar liggja út um allt eins og hráviði. Ástandið er svipað víða í sjávarþorpum á þessum slóðum.

gudsteinn@frettabladid.is