Giggs afar ánægður með Hernandez

Ryan Giggs er verulega hrifinn af hinum nýja framherja Man. Utd, Javier Hernandez, sem kom frá mexíkóska félaginu Chivas í sumar.

Þessi 21 árs gamli framherji hefur sýnt lipur tilþrif í búningi United og hefur heillað félaga sína.

"Javier hefur virkilega komið okkur á óvart. Hann er enn að læra leikinn, innan vallar sem utan. Hann er lifandi strákur sem er gaman að hafa í klefanum," sagði hinn reyndi Giggs.

"Það hefur verið mjög auðvelt að kynnast honum því hann talar frábæra ensku. Hann kom með okkur í keppnisferðalag og það er þægilegt að kynnast í slíkum ferðum. Þá fengum við líka að sjá hversu vinsæll hann er í Mexíkó. Hann er frábær viðbót við liðið sem og hópinn."