Ekki á að nota kúst eða ryksugu

Þegar sparperur brotna er hætt við kvikasilfursmiti, að því er fram kemur í umfjöllun TV2 í Danmörku. Umhverfisráðuneyti Dana stendur nú fyrir vitundarvakningu um málið. Á vef Landlæknis kemur fram að kvikasilfur í of miklu magni geti haft „skaðvænleg áhrif á vefi líkamans“.

Fram kemur í frétt TV2 að sparperur sé að finna á 90 prósentum danskra heimila.

Í kynningarefni danska ráðuneytisins segir að vegna kvikasilfursins í perunum sé nauðsynlegt að opna glugga og viðra vel þegar þær brotna. Flestir eru sagðir sleppa því, auk þess sem um sextíu prósent almennings viti ekki einu sinni af kvikasilfrinu.

Þá skiptir máli hvernig staðið er að því að hreinsa upp brotin. Ekki á að nota kúst eða ryksugu, því þá kann kvikasilfrið að dreifast enn frekar. Nota á pappír eða pappa til að skrapa saman því sem hægt er. Agnir sem setjast í rifur eða sprungur á svo að hreinsa upp með votum eldhúspappír. Næstu tvær vikur á svo að huga að því að vel lofti um herbergið. - óká