Tilbúnir að spila þrátt fyrir bónusaleysi

Richard Hughes, leikmaður Portsmouth, segir að leikmenn séu tilbúnir að leika bikarúrslitaleikinn fyrir félagið þrátt fyrir að það skuldi þeim bónusgreiðslur.

Portsmouth vann Tottenham um helgina og mun mæta Chelsea í bikarúrslitaleiknum. Liðið er þegar fallið úr úrvalsdeildinni og er í greiðslustöðvun en hefur vegnað vel í bikarnum.

Einhverjir fjölmiðlar á Englandi greindu frá því að nokkrir helstu leikmenn liðsins myndu ekki leika sjálfan bikarúrslitaleikinn vegna þess að Portsmouth skuldar þeim peninga.

„Ég er einn þeirra leikmanna sem var sagður ekki spila leikinn. Ég fór yfir samning minn og þar er ekkert sem bannar mér að spila. Við fáum ekki borgaðar bónusgreiðslur sem stendur en allir leikmenn eru á sama skipi," sagði Hughes.