Bjarni Þórður vill vera áfram hjá Stjörnunni

Markvörður Stjörnunnar, Bjarni Þórður Halldórsson, telur líklegt að hann verði áfram í herbúðum Stjörnunnar þó svo félagið hafi ekki enn lýst yfir áhuga á því að halda honum.

Samningur Bjarna við félagið er að renna út en hann hefur varið mark félagsins með miklum sóma síðustu þrjú ár.

"Ég reikna með því að vera áfram. Ég hef ekki hafið viðræður og það hefur enginn hjá félaginu rætt við mig. Það hefur enginn minnst á að þeir vilji halda mér," sagði Bjarni Þórður við Vísi í dag.

"Ég er mjög heimakær og eftir þrjú ár í Garðabænum vil ég gjarna vera áfram. Mér líst mjög vel á að Bjarni verði áfram með liðið enda hefur hann byggt upp lið frá grunni. Hann tók við frekar döpru 1. deildarliði og hefur gert það að fínu úrvalsdeildarliði. Ég vil meina að við séum besta miðjuliðið í Pepsi-deildinni."