Enska úrvalsdeildin hafnaði Mill Financial

Enska úrvalsdeildin hefur hafnað beiðni frá bandaríska vogunarsjóðnum Mill Financial um að gerast löglegur eigandi knattspyrnufélags í deildinni.

Þetta kemur fram á fréttavef Sky Sports. Allir þeir sem vilja kaupa félag í ensku úrvalsdeildinni þurfa að ganga í gegnum skoðunarferli hjá stjórn deildarinnar um hvort þeir standist kröfur hennar.

Mill Financial óskaði eftir því að verða tekið til skoðunnar í gær en þeirri beiðni var hafnað.

Mill Financial eignaðist hlut George Gillett í Liverpool í síðasta mánuði og er talið að Tom Hicks, eigandi hins hlutans, hafi reynt að selja Mill Financial sinn hluta líka.

Þar með gæti vogunarsjóðurinn greitt skuld Liverpool við skoska RBS-bankann sem á að gjaldfalla í dag og eignast þannig félagið.

Eins og áður hefur verið sagt frá í dag er þó talið afar líklegt að bandaríska eignarhaldsfélagið NESV muni eignast Liverpool í dag og greiða skuld þess við RBS-bankann.

Þeir Hicks og Gillett fengu lögbannskröfu samþykkta á söluferlið í gær en hafa nú dregið hana til baka. Ekkert virðist því til fyrirstöðu að NESV eignist félagið en enn er beðið eftir tilkynningu frá Liverpool um málið.