Ekki gefa fingur í beinni útsendingu -myndband

Margverðlaunaður veðurfréttamaður á BBC, Tómas Sjafernaker, hefur verið tekinn af skjánum eftir að hann sást „gefa fingur" í beinni útsendingu. Það var í lok fréttatíma í ágúst þegar fréttalesararnir Simon McCoy og Fiona Armstrong voru að kynna að næst yrðu sagðar veðurfréttir.

Þau sögðu með bros á vör að veðurfréttirnar yrðu 100 prósent nákvæmar. Myndavélin var auðvitað á þeim í þessari kynningu. Sjafernaker brosti á móti og gaf þeim fingurinn rétt um leið og myndavélinni var beint að honum.

Honum var sýnilega brugðið þegar hann áttaði sig á því, og reyndi að bjarga málinu með því að klóra sér á kinninni. Það var nokkuð augljóst að veðurfréttamaðurinn var að gantast við félaga sína, en BBC tók það ekki gilt sem afsökun.