Fergie sögð miður sín og full iðrunar

Sarah Ferguson, hertogaynja af York, er sögð miður sín og full iðrunar eftir upp komst um tilraun hennar til að selja aðgang að Andrew Bretaprins, fyrrverandi eiginmanni hennar.

Rannsóknarblaðamaður sem þóttist vera auðugur kaupsýslumaður setti sig í samband við hertogaynjuna og hittust þau í tvígang til að ræða málin, fyrst á hóteli í New York og síðan á fínum veitingastað í Lundúnum. Þaðan fóru þau í herbergi á Mayfair hótelinu, þar sem blaðamaðurinn hafði komið fyrir falinni myndavél og gengu frá samkomulaginu. Það fól í sér að kaupsýslumaðurinn greiddi Söru hálfa milljón punda, eða um 90 milljónir króna, fyrir fund með prinsinum og á myndunum sést hún taka við 40 þúsund dollurum, eða um 5,2 milljónum krónum, sem innborgun fyrir greiðann. En prinsinn er sérlegur fulltrúi viðskiptaráðs Bretlands. Sarah sagði hinum meinta kaupsýslumanni að prinsinn vissi af samkomulaginu og hafi farið fram á fyrrgreinda upphæð, þar sem hann hafi vitað hún væri peningalítil.

Talsmaður bresku hirðarinnar segir að konungsfjölskyldan muni ekki tjá sig um málið og talsmaður prinsins fullyrðir að hann hafi ekki vitað af uppátæki eiginkonunnar fyrrverandi.

Sarah er væntanleg til Los Angeles síðar í dag til að taka við viðurkenningu fyrir sjálfboðaliðastörf hennar fyrir fátæka í Afríku.