Liverpool gæti keypt heimsklassaleikmann í janúar

Damien Comolli, yfirráðgjafi knattspyrnumála hjá Liverpool, segir að eignarfélagið New England Sports Ventures sé tilbúið að fjármagna kaup á heimsklassaleikmanni í janúarglugganum.

Liverpool-menn hafa auga á ákveðnum leikmönnum og ef að verðmiðinn er réttur þá gæti nýr stjörnuleikmaður verið á leiðinni á Anfield í janúar.

„Við höfum góða hugmynd um hvað við viljum gera og við höfðum leikmenn í sigtinu. Ef að það er möguleiki að ná í heimsklassaleikmann þá höfum við stuðninginn frá eigendunum," sagði Damien Comolli.

„John og Tom vilja vinna og það gerir þú ekki nema að hafa toppleikmenn. Það væri frábært að geta náð í slíka menn í janúar en ef að við getum það ekki þá bara bíðum við," sagði Comolli.

„Ég hef enga hugmynd um það í dag hvort við gerum eitthvað í janúar. Það verður bara að koma í ljós en við erum alltaf með langtímamarkmið félagsins í fyrirrúmi," sagði Comolli.