Ríkustu félög heims í kapphlaupi um Di Maria

Portúgalska dagblaðið A Bola greinir frá því að mörg af ríkustu félögum heims séu búin að eyrnamerkja vængmanninn Angel Di Maria fyrir næsta sumar.

Spænsku félögin Barcelona og Real Madrid ásamt ensku félögunum Manchester United, Manchester City og Chelsea eru öll á eftir argentínska landsliðsmanninum ef marka má frásögn A Bola.

Hinn 22 ára gamli Di Maria hefur skorað 4 mörk og átt 9 stoðsendingar í 26 leikjum fyrir Benfica á þessu tímabili en talið er næsta víst að þetta verði hans síðasta tímabil í Portúgal.

Benfica keypti Di Maria á 8 milljónir evra árið 2007 og leikmaðurinn er með samning til ársins 2015 en í samningnum er klausa sem gerir félögum kleift að kaupa upp samninginn á 40 milljónir evra.