Hull berst við falldrauginn án Stephen Hunt

Hull varð fyrir áfalli í dag þegar í ljós kom að þeirra markahæsti leikmaður á tímabilinu spilar ekki meira þennan veturinn. Stephen Hunt hefur ekki spilað síðan 20. febrúar en er samt sem áður markahæsti leikmaður liðsins með sex mörk.

Hull vonaðist til að Hunt yrði orðinn klár fyrir lokaslaginn en meiðsli hans hafa ekki þróast á réttan hátt. Hull situr í fallsæti, er fjórum stigum frá öruggu sæti þegar fimm umferðir eru eftir.

Hunt er 28 ára og hefur leikið 27 leiki fyrir Hull á tímabilinu en áður lék hann með Reading.