Munið þið eftir þessum leikjum Manchester United og Liverpool?

Netmiðilinn Goal.com birti í dag tvær yfirlitsgreinar um fimm flottustu sigra Manchester United á Liverpool og fimm flottustu sigra Liverpool á Manchester United. Liðin mætast á sunnudaginn í stórleik helgarinnar í ensku úrvalsdeildarinnar og hefst leikurinn klukkan 12.30 í beinni útsendingu á Stöð 2 Sport 2.

Flottustu sigrar Liverpool á Manchester United

(Hér má sjá greinina á goal.com)



[Mars 2009] Manchester United-Liverpool 1-4

Það bjuggust allir við að Manchester United myndi gera endanlega út um meistaravonir Liverpool í þessum leik og það byrjaði þannig þegar Cristiano Ronaldo kom United yfir úr víti. Fernando Torres fór hinsvegar illa með Nemanja Vidic og jafnaði leikinn og skömmu síðar skoraði Steven Gerrard úr víti sem hann fékk sjálfur. Í seinni hálfleik fauk Vidic útaf með rautt spjald og Fabio Aurelio skoraði beint úr aukaspyrnunni sem var dæmd. Varamaðurinn Andrea Dossena innsiglaði síðan sigurinn í lokin og Liverpool vann ólgeymanlegan sigur í Old Trafford.

[Apríl 1992] Liverpool-Manchester United 2-0

Mark Walters og Ian Rush tryggðu Liverpool 2-0 sigur og áttu með því mikinn þátt í því að Manchester United missti enska meistaratitilinn til Leeds. Þetta var fyrsta mark Rush á móti United.



[Desember 2000] Manchester United-Liverpool 0-1

Danny Murphy tryggði Liverpool 1-0 sigur með marki beint úr aukaspyrnu í fyrri hálfleiknum. Liverpool hefði samt getað skorað fleiri mörk en þetta var fyrsti sigur Liverpool á Old Trafford í tíu ár.

[Mars 1983] Liverpool-Manchester United 2-1

Liverpool tryggðu sér sigur í enska deildarbikarnum og hefndi fyrir tapið í bikarúrslitaleiknum sex árum fyrr þegra United eyðilagði þrennuna hjá Liverpool. Norman Whiteside kom United yfir en Alan Kennedy jafnaði með skoti af löngu færi og Ronnie Whelan tryggði Liverpool sigurinn í framlengingu.

[Desember 1978] Manchester United-Liverpool 0-3

Ray Kennedy, Kenny Dalglish og David Fairclough tryggðu Liverpool glæsilegan 3-0 sigur á Old Trafford ári eftir að United hafði slegið Liverpool út úr undanúrslitum enska bikarsins. Eftirminnilegasti sigur Liverool í leikhúsi draumanna þar til að Liverpool vann 4-1 í mars 2009.

Flottustu sigrar Manchester United á Liverpool

(Hér má sjá greinina á goal.com)



[Maí 1977] Liverpool-Manchester United 1-2

Manchester United tryggði sér enska bikarinn og kom í veg fyrir að Liverpool yrði fyrsta enska félagið til að vinna þrennuna. Liverpool var nýbúið að tryggja sér enska meistaratitilinn og átti eftir að vinna Roma í Evrópukeppni meistaraliða nokkrum dögum síðar. Öll mörkin komu á fimm mínútna kafla. Stuart Pearson kom United yfir en Jimmy Case jafnaði. Lou Macari skaut síðan í félaga sinn Jimmy Greenhoff sem tryggði United sigurinn.

[Maí 1996] Manchester United-Liverpool 1-0

Eric Cantona tryggði United enska bikarinn og um leið tvöfaldan sigur í deild og bikar með því að skora sigurmarkið fimm mínútum fyrir leikslok. United varð þar með fyrsta enska félagið til að vinna tvennuna tvisvar en því afreki höfðu United-menn einnig náð tveimur árum áður.

[Janúar 1999] Manchester United-Liverpool 2-1

Ole Gunnar Solskjaer tryggði Manchester United 2-1 sigur á Liverpool í uppbótartíma í fjórðu umferð enska bikarsins en þegar tvær mínútur voru eftir af leiknum leit út fyrir að Michael Owen væri að tryggja Liverpool sigur. Dwight Yorke jafnaði hinsvegar leikinn, Solskjaer skoraði síðan sigurmarkið og United fór síðan alla leið og vann þrennuna þetta tímabil.

[Desember 2002] Liverpool-Manchester United 1-2

Diego Forlan skoraði tvennu í þessum leik og tryggði Manchester United 2-1 sigur á Anfield en hann hafði fram af því verið einn stærsti brandarinn í ensku deildinni eftir að hafa gengið afar illa að finna netmöskvana. Jerzy Dudek gerði slæm mistök í báðum mörkunum og Úrúgvæmaðurinn nýtti sér það.

[Mars 2007] Liverpool-Manchester United 0-1

John O'Shea tryggði Manchester United 1-0 sigur á Anfield með marki á síðustu mínútu leiksins. Liverpool hafði verið miklu betra liðið í leiknum en United fékk aukaspyrnu í uppbótartíma. Pepa Reina varði þrumuskot frá Cristiano Ronaldo en hélt ekki boltanum og John O'Shea var réttur maður á réttum stað og tryggði United þrjú stig sem hjálpuðu liðinu að endurheimta enska meistaratitilinn.