Nýtt aðalskipulag Urriðafossvirkjunar unnið hratt

Sveitarstjórn Flóahrepps hefur ákveðið að hefja aðalskipulagsferli vegna Urriðafossvirkjunar upp á nýtt og vonast til að ljúka því innan sex mánaða. Hreppurinn skoðar enn þann möguleika að höfða mál gegn umhverfisráðherra til að hrinda synjun ráðherrans á fyrra aðalskipulagi.

Svandís Svavarsdóttir umhverfisráðherra tilkynnti tveimur hreppum í Árnessýslu í lok janúar að hún hefði ákveðið að staðfesta ekki aðalskipulag þeirra sem gerði ráð fyrir virkjunum í neðri Þjórsá og bar fyrir sig að Landsvirkjun hefði greitt fyrir skipulagsvinnu.

Sveitarstjórn Flóahrepps hefur nú brugðist við með því hefja gerð aðalskipulags upp á nýtt. Aðalsteinn Sveinsson oddviti segir þetta ekki þýða að fallið hafi verið frá málssókn gegn ráðherra heldur hafi verið ákveðið að setja skipulagsferlið strax af stað til að tapa sem minnstum tíma enda sé sveitarstjórnin hlynnt Urriðafossvirkjun.

Flóahreppur hyggst vinna eins hratt að málinu og mögulegt er og endurtaka ferlið með lögbundum auglýsingum, kynningarfundi og andmælafresti. Margrét Sigurðardóttir sveitarstjóri segir að skipulagsferlið taki þó minnst þrjá mánuði en telur að ef allt væri eðlilegt ætti það ekki að taka lengri tíma en sex mánuði. Hún tekur þó fram að umhverfisráðuneytið sé óútreiknanlegt.

Síðast tók það ráðuneytið ellefu mánuði í tilviki Flóahrepps en fjórtán mánuði í tilviki Skeiða- og Gnúpverjahrepps að taka ákvörðun um aðalskipulag hreppanna.