Jökull: Þetta var okkar tímabil

„Þetta var erfiðara en ég bjóst við," sagði kampakátur Jökull Elísabetarson í miðjum fagnaðarlátum Blika á Stjörnuvellinum í dag.

Breiðablik gerði markalaust jafntefli við Stjörnuna og þau úrslit dugðu Blikum til að vinna Íslandsmeistaratitilinn.

„Þetta var erfiðara en ég bjóst við. Við lögðum upp með að vinna þennan leik og við ætluðum að gera það. Svo heyrðum við reyndar seint í leiknum að Keflavík var með 2-0 forystu gegn ÍBV og það létti aðeins á þessu hjá okkur," sagði Jökull. Hefði ÍBV unnið sinn leik hefðu Eyjamenn orðið Íslandsmeistarar.

Jökull kom til Breiðabliks fyrir tímabilið en var á mála hjá Víkingi sem gekk illa í 1. deildinni í fyrra.

„Þetta eru nú aðeins breyttar aðstæður fyrir mig en ég er mjög ánægður með mig og tímabilið allt. Og raunar allt liðið. Þessir strákar gáfu lítið eftir og við áttum þetta skilið. Við gáfum út fyrir tímabilið að við ætluðum að vinna þetta og það er að skila sér," sagði Jökull sem líst vel á framtíð Breiðabliks.

„Það er ekki spurning að framtíðin er björt. Maður veit svo sem ekki hvað það verða margir leikmenn sem fara frá liðinu en þeir verða örugglega einhverjir. En á meðan Óli er í brúnni hef ég engar áhyggjur."