Björgunarsveitamenn við störf fram eftir degi

Björgunarsveitir Slysavarnafélagsins Landsbjargar í Vestmannaeyjum, Sandgerði og á Suðurnesjum hafa haft í nógu að snúast í morgun vegna snjókomu og ófærðar.

Björgunarfélag Vestmannaeyja var kallað út um klukkan sex í morgun og hafa félagar í sveitinni unnið hörðum höndum við að aðstoða fólk við að komast leiðar sinnar en mikil ófærð er í Vestmannaeyjum. Er búist við að sveitin verði við störf fram að hádegi hið minnsta.

Björgunarsveitin Sigurvon frá Sandgerði hefur frá því klukkan sjö í morgun aðstoðað á annan tug bílstjóra sem sátu fastir í bílum sínum og enn liggja fyrir mörg verkefni. Mikið hefur snjóað í Sandgerði í nótt og í morgun.

Sömu sögu er að segja í Reykjanesbæ en þar hefur Björgunarsveitin Suðurnes verið í aðstoð vegna ófærðar frá því klukkan átta í morgun. Þar er unnið að því að halda stofnleiðum opnum og að koma heilbrigðisstarfsfólki til vinnu sinnar. Mikið hefur verið hringt og beðið um aðstoð í úthverfum bæjarins en að sögn Landsbjargar verður fólk að bíða í einn til tvo tíma áður en hægt verður að fara í það.

Illfært hefur verið í Reykjavík í morgun þó ekki sé vitað til þess að Reykvíkingar hafi þurft að nýta sér aðstoða björgunarsveita.