Ríkisstjórnin úthlutar um 90 milljónum til dagskrárgerðar

Ríkisstjórnin hefur ákveðið að veita 88,5 milljónum króna til innlendrar dagskrárgerðar fyrir hljóðvarp og sjónvarp.

Um er að ræða afgang úr Menningarsjóði útvarpsstöðva og verður peningunum úthlutað í samræmi við úthlutunarreglur sjóðsins. Um verður að ræða tvær úthlutanir. Önnur þeirra verður núna í ár og hin á næsta ári.

Samkvæmt tilkynningu frá mennta- og menningamálaráðuneytinu lauk hefðbundinni starfsemi Menningarsjóðs útvarpsstöðva um aldamótin en síðan hefur inneign hans á bankareikningi ávaxtast vel og er hún nú 88,5 milljónir króna. Hlutverk sjóðsins er að veita styrki til eflingar á innlendri dagskrárgerð í hljóðvarpi og sjónvarpi.