Segist ekki setja skattfé í einkaspítalann

Tekist var á um yfirlýsingar Ögmundar Jónassonar, þingmanns VG, um væntanlegt einkasjúkrahús á gamla varnarsvæðinu á Alþingi í gær. Fram hefur komið að leggja þurfi eitt hundrað milljónir króna til að endurbyggja gamla hersjúkrahúsið á svæðinu. Hefur Ögmundur lýst því yfir að þeir peningar hljóti að koma úr vösum skattgreiðenda og það á sama tíma og skera þurfi niður í heilbrigðiskerfinu.

Kjartan Þór Eiríksson, framkvæmdastjóri Kadeco, Þróunarfélags Keflavíkurflugvallar, áréttar að 100 milljónirnar séu ekki skattfé. Hann segir að í heild hafi þróun á svæðinu á Keflavíkurflugvelli skilað heildarhagnaði í ríkissjóð. „Og þá fjármuni nýtum við til áframhaldandi uppbyggingar,“ segir hann.

Um leið segir Kjartan ljóst að ríkið hafi margfaldar tekjur af fjárfestingunni í uppbyggingu sjúkrahússins. Áætlað sé að árvissar skatttekjur ríkisins af störfum sem vegna hennar verði til nemi tæpum 300 milljónum króna á ári. Þá hjálpi fjárfestingin við að auka tekjur af öðrum eignum Kadeco, svo sem vegna íbúðablokka sem leigðar verði undir sjúklinga og aðstandendur. Ótaldar séu þá afleiddar tekjur vegna aukinna umsvifa. Þau hafi áhrif á ferðamennsku og fleiri svið. Þannig myndi koma fjögur þúsund gesta í sjúkrahúsið þýða sölu á átta til sextán þúsund flugsætum. Auknar tekjur flugfélaga gætu numið um 800 milljónum á ári. - óká