Enski boltinn má ekki breytast í rúgbý

Arsene Wenger, stjóri Arsenal, er orðinn pirraður á hörkunni í enska boltanum og segir að dómurum beri skylda til að passa upp á að leikir verði ekki eins og rúgbý-leikir.

"Ég skil vel að allir stjórar reyni að nýta styrkleika sinna leikmanna og einhver einn leikstíll er ekki endilega sá rétti. Menn mega spila eins og þeir vilja svo lengi sem dómarinn sér til þess að reglur leiksins séu virtar," sagði Wenger.

"Ég sá myndir úr leikjunum um síðustu helgi. Það er ekki lengur hægt að segja að þetta sé bara fótbolti. Eins og leikmenn pressa markverðina þá minnir leikurinn stundum meira á rúgbý," sagði Wenger og vitnaði þá aðallega í hegðun leikmanna Stoke gegn Tottenham.

"Dómarar mega ekki leyfa svona hegðun því þetta er ekki fótbolti."