Kallar samkomulagið stólpípusamning

Þorgerður Katrín Gunnarsdóttir, varaformaður Sjálfstæðisflokksins, kallar Icesave samkomulagið sem gert var í fyrrasumar stólpípusamning. Í pistli á Pressunni hvetur hún landsmenn til að hafna lögunum sem Alþingi samþykkt í lok síðasta árs og kosið verður um eftir viku.

Fundi samninganefndar Íslands og fulltrúa Hollendinga og Breta í London í fyrradag lauk án niðurstöðu. Í yfirlýsingu talsmanns breska fjármálaráðuneytisins segir að niðurstaðan sé Englendingum og Hollendingum vonbrigði.

Þorgerður Katrín segir að það sé ekki skrýtið að Hollendingar og Bretar skuli vera vonsviknir þar sem Íslendingar séu ekki lengur skjálfandi í hnjánum.

„Eftir stólpípusamninga síðastliðins sumars og hausts er heldur ekkert undarlegt að þeir skuli vera óhressir með að við gengum ekki í gær að þeirra besta boði. Í dag mæta þeim nefnilega samhentir Íslendingar og íslensk stjórnmálaöfl," segir Þorgerður Katrín.

Þá segir hún: „Mikilvægt er nú að þessi samstaða haldi áfram fram yfir þjóðaratkvæðagreiðsluna hinn 6. mars - að ekki bara stjórnarandstaða heldur stjórnarflokkarnir líka hvetji fólk til að hafna þeim hörmungarsamningi sem um er deilt á milli þjóðanna."