Segir skipanina hafa verið pólitíska

Skipan Runólfs Ágústssonar í embætti Umboðsmanns skuldara er óttalegt klúður, segir Björn Valur Gíslason, þingmaður VG. Hann segist ekki vita um nokkurn mann sem kunni að mæla henni bót og þungt hljóð hafi verið í herbúðum VG þegar að tilkynnt var um skipanina.

„Mönnum fannst þetta bera keim af gömlum valdatíma sem við vildum helst ekki fá hérna aftur," segir Björn Valur í samtali við Vísi. Aðspurður segir hann skipanina hafa verið pólitíska. „Já, blasir það ekki við? Þarf maður nokkuð að vera að velta því mikið fyrir sér? Það er bara dauður maður sem sér það ekki," segir Björn Valur.

Björn Valur segir mikilvægt að fara aftur yfir hæfni þeirra sem sóttu um starfið. „En ég get ímyndað mér að þeir sem sóttu um starfið geti verið hvekktir eftir svona rispur. Mér myndi líða þannig ef ég hefði verið metinn hæfur til að gegna starfi. Svo hefði einhver verið tekinn framfyrir í pólitískum tilgangi og það væri síðan bjallað í mig eftir að hitt gekk ekki upp," segir Björn Valur.

Björn Valur segir að félagsmálaráðherra og aðrir sem fari með svipað vald og hann þurfi að temja sér betri vinnubrögð. „Þetta tilheyrir gamla tímanum sem ég vil ekki tilheyra," segir Björn Valur. Hann segir að þessi atburðarrás kalli ekki á afsögn ráðherra. Hins vegar þurfi hann að vanda sig betur og gangast við mistökum sínum.

Björn Valur segir að í embættismannakerfinu og í opinberum stöðum séu margar stöður skipaðar mönnum sem voru ráðnir á pólitískum forsendum. Hann ítrekar að þetta sé hluti af gömlum tíma sem hann vilji ekki tilheyra. „Þetta er líka sóun á hæfileikum að ganga framhjá fólki sem hefur meiri burði til að gegna svona stöðum en hafa ekki pólitísk tengsl," segir Björn Valur.