Vill takmarka heimildir til að beita dráttarvöxtum

Illugi Gunnarsson, þingmaður Sjálfstæðisflokksins, vill að heimildir lánadrottna til að beita dráttarvöxtum séu takmarkaðar. Þetta sagði Illugi í atkvæðagreiðslu eftir aðra umræðu um frumvarp um frestun á nauðungarsölum íbúða.

„Þegar fólk er skuldugt langt umfram greiðslugetu vegna atburða sem það sjálft hafði enga stjórn á er eðlilegt að við endurskoðum heimildir sem eru til um að menn geti beitt slíkum dráttarvöxtum," sagði Illugi.

Hann sagði að dráttarvextir væru í eðli sínu refsing sem lánadrottinn gæti gripið til ef það væri ekki greiðsluvilji fyrir hendi. Illugi benti á að það væri greiðsluvilji fyrir hendi hjá íslenskum heimilum en á hinn bóginn væri ómöguleiki.

Illugi hvatti ríkisstjórnina til að koma með úrræði áður en það væri of seint. „Þetta er ekki bara vandi skuldugra heimila. Þetta er vandi þjóðarinnar allrar," sagði Illugi.