Nicklas Bendtner tryggði Arsenal sigur í uppbótartíma

Daninn Nicklas Bendtner er svo sannarlega hetja Arsenal-manna þessa dagana því hann fylgdi á eftir þrennunni á móti Porto í Meistaradeildinni í vikunni með því að skora sigurmark Arsenal í 2-1 útisigri á Hull í ensku úrvalsdeildinni í kvöld.

Nicklas Bendtner skoraði sigurmarkið á annarri mínútu í uppbótartíma þegar hann fylgdi á eftir skoti Denilson sem Boaz Myhill, markvörður Hull, varði út í teiginn.

Það virtist þó lengi ekki ætla að ganga hjá Arsenal að tryggja sér sigurinn þrátt fyrir að leika manni fleiri síðustu 45 mínútur leiksins.

Andrei Arshavin kom Arsenal í 1-0 á 13 mínútu eftir einleik í gegnum vörnina og það leit ekki út fyrir annað en að gestirnir myndu vinna öruggan sigur en annað kom þó á daginn.

Hull jafnaði nefnilega leikinn úr vítaspyrnu fimmtán mínútum síðar. Vítið fiskaði Jan Vennegoor of Hesselink en hann var þó greinilega rangstæður þegar hann fékk boltann áður en Sol Campbell braut á honum. Jimmy Bullard skoraði af öryggi úr vítinu.

George Boateng, fyrirliði Hull, fékk tvö gul spjöld á síðustu fimm mínútum fyrri hálfleik og Hull-liðið var því manni færri allan seinni hálfleikinn.

Hull-liðið barðist vel og hélt aftur af Arsenal-sókninni allt þar til á 92. mínútu þegar Daninn var á réttum stað og skoraði þetta mikilvæga mark sem kemur Arsenal-liðinu upp að hlið Chelsea á toppnum.