Allt á kafi í snjó í Eyjum - skólahaldi aflýst

Björgunarsveitarmenn voru kallaðir út í Vestmannaeyjum undir morgun til að aðstoða vaktavinnufólk, sem sat fast í bíllum sínum vegna ófærðar. Öllu skólahaldi hefur verið aflýst í bænum í dag og segir lögreglan að kolófært sé víðast hvar. Fólki er því ráðlagt að halda sig heima verði því við komið.

Þar fór snjó að kyngja niður upp úr miðnætti og er jafnframt mikill skafrenningur, þannig að víða hefur dregið í skafla. Að sögn lögreglu er aðeins jeppafæri í bænum, en það er afar fátítt í Eyjum.

Víða snjóaði talsvert á suðvestanverðu landinu í nótt og er sumstaðar þæfingsfærð á fáförnum götum á höfuðborgarsvæðinu, en snjóruðningstæki fóru að hreinsa umferðargötur seint í nótt.