Mourinho hefur enga trú á Liverpool og Arsenal

José Mourinho, þjálfari Real Madrid, hefur litla trú á því að Arsenal og Liverpool muni blanda sér í toppbaráttu ensku úrvalsdeildarinnar í ár.

Mourinho spáir því að þetta tímabil verði þriggja hesta hlaup á milli Man. Utd, Chelsea og Man. City.

"Það verður erfitt fyrir Roy Hodgson að stýra Liverpool upp í toppinn því síðustu þrjú ár hefur liðið orðið verra og verra. Hann mun þurfa tíma og verkefni hans verður erfitt því Liverpool tók ranga beygju á sínum tíma," sagði Mourinho en hann telur Arsene Wenger, stjóra Arsenal, ekki lengur geta notað þá afsökun að lið hans sé ungt.

"Arsenal virðist vera líklegt á hverju ári en svo gerist ekkert. Wenger kemur alltaf með sömu afsökunina að liðið sé ungt og muni bíta frá sér árið eftir. Þetta er ekki lengur ungt lið heldur strákar á aldrinum 25-27 ára. Fabregas, Walcott, Clichy, Song og Sagna eru engir krakkar lengur. Þeir eru komnir á þann aldur að geta unnið hluti," sagði Mourinho ákveðinn sem fyrr.

"Arsenal mun ekki vinna. Baráttan verður á milli United, Chelsea og síðan Man. City enda er City með frábæran hóp."