Landsvirkjun tryggi raforku til Helguvíkur

Katrín Júlíusdóttir iðnaðarráðherra er fylgjandi því að Landsvirkjun tryggi raforku tímabundið til álvers í Helguvík svo smíði þess tefjist ekki enn frekar.

Framkvæmdirnar í Helguvík hafa í raun verið í hægagangi allt frá því þær hófust haustið 2008, aðallega vegna erfiðrar stöðu á lánamörkuðum eftir bankahrunið. En nú hefur bæst við enn einn óvissuþáttur, 90 megavatta orka af Hellisheiði, sem Norðurál vonaði að fengist til Helguvíkur, gæti endað í kísilveri í Þorlákshöfn, vegna tímabundins forgangsréttar Sveitarfélagsins Ölfuss.

Svigrúm Landsvirkjunar er hins vegar takmarkað eftir að umhverfsráðherra stöðvaði virkjanir í neðri Þjórsá. Engu að síður á fyrirtækið umtalsverða afgangsorku sem gæti nýst Helguvík.