Redknapp: Gallas ekki á glórulausum launum

Franski varnarmaðurinn William Gallas er búinn að skrifa undir eins árs samning við Tottenham. Hann kemur frá Arsenal á frjálsri sölu.

Gallas er sagður hafa viljað fá 80 þúsund pund í vikulaun hjá Arsenal en við því hafi félagið ekki orðið. Þess vegna hafi honum verið sleppt frá félaginu.

Harry Redknapp, stjóri Tottenham, segir að Gallas sé ekki á fáranlega háum launum hjá Spurs.

"Hann hefur aldrei beðið um háar fjárhæðir. Stjórnarformaðurinn er búinn að ganga frá eins árs samningi við leikmanninn og launin eru mjög sanngjörn," sagði Redknapp.

Gallas mun nú ná þeim merkilega árangri að leika með þremur Lundúnarliðum en hann lék með Chelsea áður en hann fór til Arsenal.