Kastaníutré Önnu Frank fær framhaldslíf

Í dagbók sinni, Dagbók Önnu Frank minnist hollenska gyðingastúlkan oft á kastaníutré sem stóð fyrir utan glugga í risinu þar sem fjölskylda hennar faldi sig fyrir nazistum í síðari heimsstyrjöldinni.

Hún fann hugarró í því að fylgjast með trénu þegar það blómstraði og vaggaði í vindinum.

Tréð var svo illa farið undir það síðasta að borgaryfirvöld í Amsterdam vildu fella það. Það vakti mikil mótmæli og dómari bannaði fellinguna meðan kannað væri hvort hægt væri að bjarga því á einhvern hátt.

Náttúran greip svo í taumana í sumar. Þá féll þetta 30 tonna ferlíki í miklu óveðri.

En því hefur nú verið tryggt framhaldsllíf. Græðlingar af því verða sendir á viðeigandi staði, meðal annars hefur Montrealborg í Kanada tryggt sér græðling.

Talið er að tréð hafi verið 150-180 ára gamalt. Sjálf var Anna 15 ára þegar hún lést í útrýmingarbúðum nazista, Bergen Belsen.