Murphy: Liverpool ætti að vera að berjast um titilinn

Danny Murphy, fyrirliði Fulham, segir að miðað við þann pening sem Rafa Benítez hefur eytt í liðið ætti það að vera að berjast um meistaratitilinn á Englandi.

„Þeir hafa klárlega eytt nægum fjármunum í liðið og fengið nokkra góða leikmenn. Það á að gera þær kröfur að liðið nái árangri miðað við þessar upphæðir. Árangurinn hefur hinsvegar látið á sér standa," sagði Murphy.

Benítez hefur varið 229 milljónum punda í leikmenn. „Ég hef orðið fyrir vonbrigðum með gengi liðsins. Ég vil sjá liðinu vegna vel en það hefur átt í vandræðum," sagði Murphy.

Eftir markalaust jafntefli um helgina eru vonir liðsins um Meistaradeildarsæti afar veikar.