Fyrirliði Leiknismanna samdi við Val

Halldór Kristinn Halldórsson hefur gert þriggja ára samning við Valsmenn en hann hefur verið fyrirliði Leiknismanna undanfarin ár og var einn af lykilmönnunum á bak við frábæran árangur liðsins í 1. deildinni í sumar. Þetta kom fram í fréttatilkynningu frá Val.

Halldór er 22 ára, hefur leikið 135 leiki í meistaraflokki með Leikni og skorað í þeim 5 mörk. Hann er mjög efnilegur miðvörður og hefur farið til reynslu til nokkurra liða í Evrópu s.s. eins og Hearts í Skotlandi, Bröndby í Danmörku og AZ Alkmaar í Hollandi. Halldór á einnig að baki níu U19 landsleiki og einn U17 landsleik.

Halldór segist spenntur fyrir þessu tækifæri, aðstaðan og allur aðbúnaður sé eins og best verður á kosið. "Það verður spennandi að vinna með Kristjáni. Áætlanir hans sýna að Valur er stórhuga fyrir næsta sumar," er haft eftir Halldóri í fréttatilkynningu frá Val.