Ferguson: Rooney vill fara frá United

Sir Alex Ferguson, stjóri Man. Utd, hefur staðfest við MUTV að Wayne Rooney vilji fara frá félaginu. Samningaviðræður eru ekki í gangi og fátt sem bendir til annars en að Rooney sé á förum.

"Við byrjuðum að ræða um nýjan samning síðasta sumar. Um miðjan ágúst hringir umboðsmaður hans í okkur og sagði að Rooney ætlaði ekki að skrifa undir nýjan samning. Ég skildi það alls ekki því mánuði áður sagðist Wayne elska félagið og sagðist ætla að klára ferilinn sinn hér," sagði Ferguson í viðtalinu í dag.

"Ég veit hreinlega ekki hvað breyttist hjá honum. Við vorum í miklu áfalli yfir þessum tíðindum. Kölluðum strákinn síðan á fund og þar undirstrikaði hann við okkur að hann vildi fara. Ég tjáði honum þá að hann skildi virða félagið engu að síður og ekki vera í neinu rugli. Hvort hann hefur sýnt félaginu virðingu verður fólk að dæma sjálft."

Ferguson staðfesti einnig að það væru engar samningaviðræður í gangi enda vill Rooney ekkert ræða nýjan samning.

"Dyrnar standa honum samt opnar ef honum snýst hugur. Þessi ákvörðun hans veldur mér persónulega miklum vonbrigðum. Ég trúi þessu varla. Hann var nýbúinn að segjast ætla að vera hér fyrir lífstíð og svo gerist þetta. Við vorum til í að gera vel við hann. Svo vel að hann hefði orðið launahæsti leikmaður landsins," sagði Ferguson.

Hann segir vonbrigðin sérstaklega mikil þar sem United hafi alla tíð gert allt sem félagið gat til þess að hjálpa leikmanninum á allan hátt.

Ferguson ræddi einnig um þá yfirlýsingu Rooney að hann hefði ekkert verið meiddur líkt og Ferguson hafði áður sagt.

"Hann var meiddur og strákurinn sagði það sjálfur. Hann fór í myndatöku þar sem það sést svart á hvítu. Hann gat æft en var ekki heill heilsu. Hvers vegna hann ákvað samt að segja þetta skil ég ekki. Það voru mér persónulega mikil vonbrigði að hann skildi haga sér á þennan hátt."