Vill að fólk njóti lágmarks friðhelgi

„Nei, ég ætla ekkert að fara yfir það í augnablikinu," segir Sóley Tómasdóttir, oddviti Vinstri grænna í Reykjavík, aðspurð um að útskýra ummæli sín frekar sem hún lét falla í morgunútvarpi Rásar 2 í morgun. Þar sagðist hún ætla að skoða réttarstöðu sína vegna ummæla sem voru látin falla um hana í kosningabaráttunni.

Sóley vill ekki gefa upp hvers konar ummæli þetta voru. „Það þarf ekkert annað en að renna yfir umfjöllun í kosningabaráttunni," segir hún og tekur fram að þessi meintu ummæli hafi birst bæði í blöðum og netheimum. „Og bara víða. Þetta á ekki að viðgangast í samfélaginu. Þetta snýst um að fólk fái að njóta lágmarks friðhelgi þó það gegni opinberum embættum."

Hún segir að fólk hafi lagt ansi mikið á sig til að viðhalda ímyndinni um öfgafullan feminisma og hafi persónugert hana í þeirri baráttu. Aðspurð um hvort að slíkt hafi ekki viðgengist áður en kosningabaráttan hófst í vor segir Sóley: „Það ágerðist mjög í kosningabaráttunni, það er bara eitthvað sem á ekki að líðast."

Málið er þó enn á byrjunarstigi. „Ég er með fólk í að skoða þetta mál, það er ekki búið að leggja fram neina kæru. Við erum bara að fara yfir gögn og skoða þetta."