Björgólfur Takefusa til liðs við Víkinga

Björgólfur Takefusa hefur ákveðið að ganga til liðs við nýliða Víkings í Pepsi-deild karla. Þetta kom fram á blaðamannafundi sem Víkingar halda þessa stundina í Víkinni.

Björgólfur er 30 ára framherji sem hefur fjórum sinnum skorað 10 mörk eða fleiri á einu sumri í úrvalsdeild karla. Hann skoraði 6 mörk í 19 leikjum með KR í sumar en skoraði samtals 30 mörk tímabilin 2008 og 2009.

Víkingar unnu 1. deild karla í sumar og eru komnir aftur upp í Pepsi-deildina eftir þriggja ára fjarveru. Björgólfur er annar leikmaðurinn sem Víkingar semja við en um helgina sömdu þeir einnig við Fjölnismanninn Pétur Georg Markan.

Björgólfur hafði áður gefið það út að hann yrði ekki áfram með KR en hann fékk fá tækifæri eftir að Rúnar Kristinsson tók við þjálfun liðsins í sumar.

Björgólfur hefur spilað með KR undanfarin fimm tímabil en lék þar á undan með Fylki og Þrótti. Hann hefur alls skorað 73 mörk í 136 leikjum í efstu deild þar af 50 í 89 leikjum með KR-liðinu.

Björgólfur fékk gullskóinn sem markahæsti leikmaður úrvalsdeildar karla sumurin 2003 (með Þrótti) og 2009 (með KR) hann á einnig tvo silfurskó frá 2006 og 2008.