Bullard mögulega á leið til Celtic

Forráðamenn Hull City eru sagðir reiðubúnir að íhuga að selja Jimmy Bullard eftir að félagið féll úr ensku úrvalsdeildinni í vor.

Bullard er launahæsti leikmaður liðsins og vill félagið skera niður launakostnað fyrir næsta tímabil. Celtic í Skotlandi mun hafa áhuga á að fá hann í sínar raðir.

„Við vitum af áhuga Celtic," sagði Adam Pearson, yfirmaður knattspyrnumála hjá Hull við skoska fjölmiðla í dag. „Enginn hjá Celtic hefur haft beint samband við mig en ég veit að fulltrúar Celtic hafa rætt við nokkra af þjálfurum okkar um Jimmy Bullard."

„Það vita allir að við eigum í fjárhagsvandræðum og við þyrftum því að taka öll tilboð sem berast í leikmenn til skoðunar."