Rannsaka andlát tveggja barna á spænsku hóteli

Spænska lögreglan rannsakar nú andlát tveggja breskra barna á hótelbergi á ferðamannstaðnum Lloret de Mar í austurhluta landsins. Móðir þeirra óskaði eftir aðstoð en börnin, eins árs drengur og fimm ára gömul telpa, voru látin þegar sjúkraflutningamenn komu á staðinn.

Ekkert bendir til þess að börnin hafi verið beitt ofbeldi en lögregla verst allra fregna og ætlar að bíða niðurstaðna krufningar. Móðurinni hefur verið meinað að yfirgefa landið í bili.

Ferðamannastaðurinn Lloret de Mar er um 70 kílómetra frá Barcelona og nýtur mikilla vinsælda meðal breskra ferðamanna.