Atli Viðar: Engin sárabót að fá bronsskóinn

Atli Viðar Björnsson skoraði sitt fjórtánda mark í sumar þegar hann innsiglaði 3-0 sigur FH á Fram á Laugardalsvellinum í dag. Atli Viðar fékk bronsskóinn þar sem hann spilaði fleiri leiki en bæði Gilles Ondo og Alfreð Finnbogason.

„Við gerðum okkar eins og við stefndum að. Við vorum allan tímann ákveðnir í því að koma hingað reyna að spila góðan leik og klára þau þrjú stig sem hér voru í boði. Við ætluðum síðan bara að sjá til hvað myndi gerast á hinum völlunum. Því miður féll þetta ekki með okkur annarsstaðar," sagði Atli Viðar.

„Ég verð að viðurkenna það að ég heyrði það þegar það var lesið upp í kallkerfinu hvað var í gangi. Þeir voru samt ekkert að kalla inn á völlinn af bekknum. Maður heyrði það undir lokin að það væri 0-0 í Garðabænum og þá lifði maður í voninni. Þetta gekk ekki í dag," sagði Atli Viðar.

„Það er í sjálfu sér engin sárabót að fá bronsskóinn en það er nú bara þannig að þeir sem skora flestu mörkin fá þessa skó. Mér er í sjálfum sér alveg sama. Þetta þriðja mark stútaði leiknum endanlega en það sem stendur uppi er svekkelsi því að við gerðum allt sem við gátum og unnum þessa síðustu leiki eins og við ætluðum að gera. Það eru stig sem við töpuðum í byrjun móts og um mitt mót sem eru okkur dýr," sagði Atli Viðar að lokum.