Grasið á Wembley er til skammar - líkt við skautasvell

Ástand grassins á þjóðarleikvangi Englendinga er mikið til umræðu eftir undanúrslitaleiki bikarkeppninnar sem fram fóru um helgina. Sumir ganga svo langt að segja grasið vera hreina skömm fyrir ensku þjóðina.

Harry Redknapp, stjóri Tottenham, var allt annað en sáttur með leikvöllinn eftir 0-2 tap liðsins á móti Portsmouth um helgina og Martin O'Neill, stjóri Aston Villa, var á sömu skoðun eftir 0-3 tap fyrir Chelsea daginn áður.

Fabio Capello, landsliðsþjálfari Englands og Alex Ferguson, stjóri Manchester United, hafa báðir gagnrýnt grasið á vellinum en það hefur verið skipt tíu sinnum um grasið á nýja Wembley síðan að hann var tekinn í notkun árið 2007.

„Þetta er þjóðarskömm, bæði fyrir okkar iðngrein sem og fyrir breskt torf í heild sinni," sagði David Saltman, yfirvallarvörður á Þúsaldarleikvanginum í Cardiff en sá völlur hýsti alla úrslitaleiki enska boltans á meðan að verið var að byggja nýja Wembley.

Völlurinn var tyrfður fyrir fjórum til fimm vikum en hann þykir vera mjög harður og sumir hafa líkt honum við tyrft skautasvell. Það er nóg um að vera á vellinum á næstunni en sex leikir fara fram á vellinum frá 15. til 30. maí þar á meðal bikarúrslitaleikur Chelsea og Portsmouth og landsleikur Englands og Mexíkó.

Þetta slæma ástand grasvallarins þykja ekki hjálpa til í baráttu Englendinga fyrir því að fá að halda HM 2018 og þá eru sumir farnir að kvíða fyirr stóra prófinu á næsta tímabili þegar Wembley-völlurinn á að hýsa sjálfan úrslitaleik Meistaradeildarinnar.