Marlon King sífellt til vandræða í fangelsinu

Knattspyrnukappinn Marlon King var leystur undan samningi við Wigan í október síðastliðnum. King var fundinn sekur um líkamsárás og kynferðislegt áreiti sem mun hafa átt sér stað á skemmtistað í London.

Hann var dæmdur til 18 mánaða fangelsisvistar en hann hefur einnig lent í vandræðum vegna þjófnaðar og fyrir að ráðast á lögregluþjón svo eitthvað sé nefnt.

Í fangelsinu hefur King gengið í gegnum lífstílsbreytingu. Hann hefur snúið sér að múslimatrú og beðið um að vera kallaður Abu Hamza Tariq í höfuðið á hryðjuverkamanninum Abu Hamza sem hann segir vera átrúnaðargoð sitt.

King eyðir mörgum klukkutímum í að lesa bækur um Islam í klefanum og biður fimm sinnum á dag. Hann talar ekki við samfanga sína nema þeir séu múslimar.

Vera hans í fangelsinu hefur alls ekki verið vandræðalaus. Kókaín fannst í klefa hans í síðasta mánuði og þá lenti hann í slagsmálum við aðra fanga. Einnig reyndi hann að smygla inn farsímum í fangelsið.

Samkvæmt frétt The Sun hefur þessi þriggja barna faðir sagt einhverjum öðrum föngum að eftir að hann hafi afplánað dóm sinn muni hann ganga til liðs við Chelsea. Munnlegt samkomulag sé þess efnis. Ekki er öll vitleysan eins.