Ferguson ósáttur við Wenger

Eina ferðina enn hefur slest upp á vinskap Sir Alex Ferguson og Arsene Wenger. Þeir félagar voru vanir að takast á hér áður en hafa verið merkilega kurteisir hvor við annan síðustu ár.

Ferguson er núna afar ósáttur við Wenger eftir að Arsenal-stjórinn gagnrýndi Paul Scholes sem hefur farið á kostum með Man. Utd í upphafi leiktíðar.

Wenger sagðist vera aðdáandi hæfileika Scholes en bætti við að leikur miðjumannsins ætti sér dekkri hliðar og hefur líkast til verið að vitna í að Scholes á það til að fara í skrautlegar tæklingar.

"Ég veit ekki af hverju Arsene var að segja þetta. Þegar maður er beðinn um álit á leikmanni í sama gæðaflokku og Paul Scholes þá skil ég ekki af hverju nokkur maður segi svona," sagði Ferguson ósáttur.

"Það er mjög auðvelt að finna neikvæðu hliðarnar hjá öllum leikmönnum ef því er að skipta. Ég gæti til að mynda sagt slæma hluti um einn ákveðinn leikmann Arsenal en það vita allir að slíkt er óþarfi. Paul er ekki besti tæklarinn í deildinni en hann hefur aldrei slasað neinn.

"Það ætti frekar að einblína á þann styrk og hæfileika sem Paul hefur sem og framlag hans til ensku deildarinnar í 18 ár. Það er algjörlega einstakt."