Tæplega fimm þúsund bílar á ábyrgð tryggingafélaganna

Alls eru 4.684 ótryggð ökutæki í umferð í dag. Flest eru þau á skrá Umferðarstofu vegna vangoldinna tryggingagjalda. Tryggingafélögin bæta tjón sem þessi ökutæki valda. Ótryggðum ökutækjum hefur fjölgað mikið á síðustu árum. Árið 2005 voru þau tæplega 2.500 talsins og í fyrra tæplega 4.000.

Þegar eigandi ökutækis hefur ekki greitt iðgjald sendir tryggingafélagið tilkynningu til Umferðarstofu sem skráir það ótryggt. Lögreglan fær útlistun á þeim bílum mánaðarlega og klippir af þeim númerin.

Árni Friðleifsson, hjá umferðardeild lögreglunnar, segir mál sem þessi ekki vera í hæsta forgangi hjá lögreglunni en þeim sé þó vissulega sinnt eftir bestu getu. Ef ótryggt ökutæki veldur öðrum tjóni í umferðinni ber tryggingafélagi þess ökumanns sem tjóninu olli að bæta fyrir það. Séu liðnar meira en fjórar vikur síðan trygging féll niður sökum vanskila er fjármagn sótt í sjóð Alþjóðlegra bifreiðatrygginga á Íslandi (ABÍ), sem öll bílatryggingafélög eru með aðild að.

Jón Ólafsson, framkvæmdastjóri ABÍ, segir sjóðinn bæta fyrir hátt í hundrað tjón á ári og fjárhæðirnar geti skipt tugum milljóna. Algengt sé að rukkanir til einstaklinga vegna endurkröfurétts gangi misvel. „Við eigum mjög sterka endurkröfu á eigandann og ökumanninn og við eltum þetta fólk alveg til enda," segir Jón. „En ef við náum því ekki þurfa tryggingafélögin að koma til og borga okkur."

Einar Magnús Magnússon, verkefnastjóri hjá Umferðarstofu, segir ákveðna sanngirni felast í ferlinu. „Það er verið að sjá til þess að fórnarlambið þurfi ekki að standa í kröfum til að fá tjónið bætt. Enginn hefur rétt á því að afsala sér tryggingu. Ökutækin verða ólögleg um leið og þau eru ótryggð og verða þá ekkert annað en tilræðistæki." - sv