Komið að BBC að hæla Gylfa

Gylfi Sigurðsson hefur skorað átta mörk í síðustu átta heimaleikjum Reading. Enn einu sinni er Íslendingnum svo hrósað af stóru miðlunum á Englandi.

Í síðustu viku var Gylfa hampað í The Guardian og þar hefur hann bæði verið kallaður besti spyrnumaður Englands og besti leikmaður ensku Championship deildarinnar.

Nú er það BBC.

Miðillinn fjallar í dag um sjö leikmenn sem vert er að fylgjast með í deildinni í vetur og er Gylfi þar efstur á blaði.

Þar segir meðal annars að hann hafi leikið lykilhlutverk í endurreisn Reading og að hann sé klárlega maður sem fylgjast þarf með.

Það sé erfitt fyrir leikmenn að leika sama leikinn tvö tímabil í röð en að Gylfi sé hættulegasti leikmaður deildarinnar.